اسلام آباد ۔ 21 اگست (اے پی پی) دریائے ستلج اچ ودھ سارا پانڑیں آونڑ پاروں قصور دے نیڑے 18وستیاں پانڑیں اچ بڈ گئن۔ زیادہ متاثر تھیونڑ آلیاں ترائے وستیاں کوں خالی کرا گھدا گے ، ریسکیو اتے ریلیف دے سارے ادارے الرٹ ہن،دریائے سندھ اچ درمیانے درجے دا سیلاب اے جڈاں جو وڈے دریاویں وچ پانڑیں خطرے دے نشان توں تلے ریکارڈ کیتا گے ۔ نیشنل ڈیزاسٹر مینجمنٹ اتھارٹی (این ڈی ایم اے) دے ترجمان بریگیڈیئر مختار احمد دے مطابق دریائے ستلج اچ پانڑیں ودھدا پئے ، دریا اچ گنڈا سنگھ آلا تے پانڑیں دا لیول 19 فٹ اتے بہاو 56 ہزارکیوسک اے، دریا دے آسے پاسے قصور اچ 18وستیاں پانڑیں اچ بڈ گئن ۔ ترجمان ۔ ضلعی انتظامیہ قصور 17 کیمپ قائم کرڈتن لیکن انہاں کیمپس اچ کہیں وی حالی تئیں رہائش اختیار کائنی کیتی۔ انہاں آکھیا بہوں متاثرہ وستیاں اچ مستی کے، چدر سنگھ اتے بکی ونڈ شامل ہن۔ ترجمان آکھیے جو ہک لکھ توں ڈڈھ لکھ کیوسک سیلابی پانڑیں دا ریلہ اج گنڈا سنگھ والا ہیڈ ورکس توں لنگھسے۔ دریائے ستلج دے نال سارے ضلعیںبشمول اوکاڑہ، پاک پتن، وہاڑی دی انتظامیہ الرٹ اے۔ پی ڈی ایم اے پنجاب، متعلقہ ضلعی انتظامیہ، ریسکیو 1122، پاک فوج دے دستے ساریاں تیاریاں مکمل کرگھدن۔ترجمان ڈسائے جو دریا دے آسے پاسے نشیبی علاقیں اچ رہائشیاں دی منتقلی دا پلان تیار اے تے ہنگامی کیمپس قائم کرڈتے گن ۔ ترجمان ڈسائے جو دریائے سندھ اچ گدو دی جاہ تے ایں وقت درمیانے درجے دا سیلاب اے ۔ایندے علاوہ سارے ملکی دریاواں تے ہیڈورکس تے پانڑیں وہندا پئے تے خطرے دے نشان توں تلے ہے ۔انہاں ڈسایا جو راول ڈیم ایں وقت اپنڑی گنجائش دے مطابق فل اے جیں دے سپل ویز کھول ڈتے گن ۔
دریائے ستلج اچ ودھ سارے پانڑیں آونڑ پاروں قصور دیاں 18 وستیاں پانڑیں اچ بڈ گئن،ہنگامی کیمپ قائم کرڈتے گن، ترجمان این ڈی ایم اے
مضمون کا ماخذ : راکی
متعلقہ مضامین
